(ដាកា)៖ យោងតាមអង្គការសុខភាពពិភពលោក (WHO) និងក្រុមអ្នកស្រាវជ្រាវបានឱ្យដឹងនៅថ្ងៃព្រហស្បតិ៍នេះថា ក្រុមមន្ត្រីសុខាភិបាលដែលកំពុងប្រយុទ្ធប្រឆាំងនឹងការផ្ទុះរាតត្បាតជំងឺអេបូឡា (Ebola) នៅភាគខាងកើតសាធារណរដ្ឋប្រជាធិបតេយ្យកុងហ្គោ កំពុងប្រើប្រាស់ទិន្នន័យទូរស័ព្ទដៃដែលត្រូវបានលាក់អត្តសញ្ញាណ ដើម្បីគូសផែនទីនៃការផ្លាស់ទីរបស់ប្រជាជន និងកំណត់តំបន់ប្រឈមខ្ពស់ដែលវីរុសនេះអាចនឹងឆ្លងរាលដាលបន្ទាប់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣ ខែកញ្ញា ឆ្នាំ២០២៦។
វិធីសាស្ត្រថ្មីដែលមិនធ្លាប់ត្រូវបានប្រើប្រាស់ពីមុនមកក្នុងការឆ្លើយតបនឹងជំងឺអេបូឡានេះ ត្រូវបានដាក់ឱ្យអនុវត្តស្របពេលដែលអាជ្ញាធរកំពុងប្រឈមនឹងការផ្ទុះរាតត្បាតដ៏លឿនបំផុតនៅក្នុងប្រវត្តិសាស្ត្រ ដោយបច្ចុប្បន្នបានឆ្លងរាលដាលដល់ខេត្តចំនួន ៦ ឆ្លងលើមនុស្សជាង ៦,២៥០នាក់ និងបានសម្លាប់មនុស្សចំនួន ៣,០៣៩នាក់ គិតចាប់តាំងពីការផ្ទុះឡើងត្រូវបានប្រកាសកាលពីថ្ងៃទី១៥ ខែឧសភា។
ប្រធានផ្នែករោគរាតត្បាតនៃកម្មវិធីសង្គ្រោះបន្ទាន់របស់ WHO លោក Olivier Le Polain បានគូសបញ្ជាក់ដូច្នេះថា «ការផ្លាស់ទីរបស់ប្រជាជន តែងតែជាកត្តាសំខាន់ក្នុងការផ្ទុះជំងឺ ប៉ុន្តែវាពិតជាមានសារៈសំខាន់ខ្លាំងណាស់នៅក្នុងការរាតត្បាតពេលនេះ... វាផ្តល់ឱ្យយើងនូវការយល់ដឹងកាន់តែច្បាស់លាស់អំពីហានិភ័យ»។ ការវិភាគទិន្នន័យនេះ ត្រូវបានរៀបចំឡើងដោយអង្គការមិនរកប្រាក់ចំណេញស៊ុយអែត Flowminder ដោយប្រើប្រាស់កំណត់ត្រាតភ្ជាប់បណ្តាញទូរស័ព្ទដែលផ្តល់ជូនដោយឥតគិតថ្លៃពីក្រុមហ៊ុនទូរគមនាគមន៍ Vodacom ធំជាងគេនៅកុងហ្គោ ដោយមិនមានការបង្ហាញអត្តសញ្ញាណផ្ទាល់ខ្លួនរបស់អ្នកប្រើប្រាស់ឡើយ។
ស្ថាបនិកអង្គការ Flowminder លោក Linus Bengtsson បានប្រាប់ Reuters ថា «យើងព្យាយាមផ្តល់នូវការប៉ាន់ស្មានអំពីរបៀបដែលមនុស្សធ្វើដំណើរ ដែលជាការទស្សន៍ទាយអំពីរបៀបដែលអ្នកផ្ទុកមេរោគធ្វើដំណើរផងដែរ»។ ការវិភាគដំបូងកាលពីខែមិថុនា បានតាមដានចរន្តធ្វើដំណើររបស់ប្រជាជនចេញពីតំបន់ផ្ទុះជំងឺដំបូងក្នុងខេត្ត Ituri និង North Kivu ហើយជាលទ្ធផល នៅចុងខែមិថុនា គោលដៅសំខាន់ៗទាំង ១០ ដែលទទួលលំហូរអ្នកធ្វើដំណើរច្រើនជាងគេ សុទ្ធតែបានរាយការណ៍ពីការរកឃើញករណីឆ្លងជំងឺអេបូឡាពិតប្រាកដ។
គួរបញ្ជាក់ថា នេះគឺជាការផ្ទុះរាតត្បាតជំងឺអេបូឡាលើកទី១៧ នៅក្នុងប្រទេសកុងហ្គោ ដែលបង្កឡើងដោយវីរុសប្រភេទ Bundibugyo ខណៈដែលរហូតមកទល់ពេលនេះ មិនទាន់មានវ៉ាក់សាំង ឬការព្យាបាលណាមួយត្រូវបានអនុម័តឱ្យប្រើប្រាស់ជាផ្លូវការនៅឡើយទេ៕
