(កំពង់ស្ពឺ)៖ ដោយទទួលបានព័ត៌មានពីការក្រុមប្រចាំការលេីផ្លូវល្បឿនលឿន ជាមួយការបញ្ជាដឹកនាំពីសំណាក់លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ, កម្លាំងអធិការនគរបាលស្រុកភ្នំស្រួច សហការជាមួយកម្លាំងប្រចាំការលេីផ្លូវល្បឿនលឿន ស្រាវជ្រាវបន្ទាន់លេីករណីបុរសដែលយកដែកដាក់លេីផ្លូវល្បឿនលឿន ចន្លោះគីឡូម៉ែត្រPK54_55 ស្ថិតក្នុងភូមិក្រាំងពោធិ៍ ឃុំអូរ ស្រុកភ្នំស្រួច ខេត្ដកំពង់ស្ពឺ។
លោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួច បានបញ្ជាក់ថា ករណីបុរសសង្ស័យឈ្មោះ សេង សុខ អាយុ៣៤ឆ្នាំ រស់នៅភូមិក្រាំងពោធិ៍ ឃុំអូរ ស្រុកភ្នំស្រួច បានធ្វេីសកម្មភាពលួចដែកមូល មានប្រវែង៦ម៉ែត្រចំនួន២ដើម នៅក្នុងចំការមួយកន្លែងក្នុងឃុំអូរស្រុកភ្នំស្រួច។ ក្រោយលួចបានហើយក៏ដើរឆ្លងកាត់ឡើងទៅលើផ្លូវល្បឿនលឿន (ទិសដៅពីលិចទៅកើត) បានទុកដែក ដាក់ទទឹងកណ្ដាលទ្រូងផ្លូវ ស្របពេលមានរថយន្ដបេីកមកដល់បានគេច និងប៉ះបណ្ដាលឲ្យមានការព្រួយបារម្ភថាជាសកម្មភាពស្ទាក់ប្លន់រថយន្ដ នៅយប់ថ្ងៃទី១ ខែតុលា ឆ្នាំ២០២៦។
ក្នុងនោះ បានបណ្ដាលឲ្យរថយន្ដ Prius មួយគ្រឿង ពាក់ផ្លាកលេខសៀមរាប2D-2010 រងការខូចខាតផ្នែកខាងមុខ តែមិនបណ្ដាលឲ្យរងរបួសមនុស្សនោះទេ។ បច្ចុប្បន្នសមត្ថកិច្ចបានធ្វេីការឃាត់ខ្លួនជនសង្ស័យ រួមជាមួយវត្ថុតាងដែកចំនួន២ដេីម បញ្ជូនមកអធិការដ្ឋាននគរបាលស្រុកភ្នំស្រួច ដើម្បីចាត់ការបន្ដតាមច្បាប់៕
