(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងដល់ សាធារណជន ជាពិសេសប្រជាពលរដ្ឋខ្មែរ ដែលមានបំណងស្វែងរកការងារធ្វើនៅក្រៅប្រទេស ឱ្យមានការប្រុងប្រយ័ត្នខ្ពស់។
ក្រសួងបានអះអាងថា ថ្មីៗនេះ ក្រសួងបានកត់សម្គាល់ឃើញថា មានជនឆ្លៀតឱកាសមួយចំនួនបានផ្សព្វផ្សាយព័ត៌មានតាមបណ្ដាញសង្គម អំពីការសម្របសម្រួលផ្តល់សេវា និងរត់ការជួយប្រជាពលរដ្ឋខ្មែរ ដើម្បីទៅធ្វើការនៅក្រៅប្រទេស ដោយពុំមានការអនុញ្ញាតត្រឹមត្រូវពីក្រសួងឡើយ។
សកម្មភាពខុសច្បាប់ទាំងនេះ អាចបង្កហានិភ័យខ្ពស់ដល់សុវត្ថិភាព និងសិទ្ធិស្របច្បាប់របស់ពលករខ្មែរនៅបរទេស។ ដើម្បីធានាបាននូវការធ្វើទេសន្តរប្រវេសន៍ការងារដោយសុវត្ថិភាព ការការពារសិទ្ធិ និងអត្ថប្រយោជន៍ស្របច្បាប់របស់ប្រជាពលរដ្ឋខ្មែរ ក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់អំពីយន្តការផ្លូវការដែលកំពុងអនុវត្តក្នុងការបញ្ជូនជនទេសន្តរប្រវេសន៍ការងារខ្មែរទៅធ្វើការនៅក្រៅប្រទេសដោយស្របច្បាប់។
ក្រសួងសូមអំពាវនាវដល់ប្រជាពលរដ្ឋទាំងអស់ ឱ្យស្វែងយល់ និងប្រើប្រាស់តែយន្តការផ្លូវការដែលទទួលស្គាល់ដោយក្រសួងប៉ុណ្ណោះ ដើម្បីចៀសវាងការធ្លាក់ចូលទៅក្នុងអន្ទាក់របស់ជនខិលខូច ដែលអាចនាំឱ្យបាត់បង់ប្រាក់កាស ពេលវេលា និងប្រឈមមុខនឹងបញ្ហាផ្សេងៗនៅបរទេស៕
ខាងក្រោមនេះជាសេចក្តីប្រកាសរបស់ក្រសួងការងារ៖
